Atención: é unha proposta para discutir na xuntanza do 2 de setembro, 20:30, no Cantón bar.
Proposta de
presentación para a xuntanza do 2 de setembro
O motivo desta xuntanza
é botar a andar un proceso colectivo que teña como finalidade poñer
en mans da veciñanza o goberno do concello de Ribadeo.
Algo que, dito así,
pode parecer a presentación doutra candidatura electoral mais que se
sume ás xa existentes, pero que quere ir moito mais alá, pois nace
da necesidade de rachar coas formulas de participación e de
representación política ás que estamos afeitos para construír
unha verdadeira alternativa cidadá.
Para quen se achegue
despois de ler na prensa, ou escoitar nalgún medio, que a proposta
responde ao interés dalgún grupo ou partido político, tamén é
obrigado facer algunha aclaración, pois esta vai ser, seguramente,
unha batalla na que nos teñamos que empregar a fondo se queremos
chegar cunha mensaxe clara e nítida a toda a veciñanza.
É certo que no grupo
promotor houbo persoas que pertencen a partidos políticos, do mesmo
xeito que houbo persoas que pertencen a outras organizacións de
carácter veciñal, sindical, etc., e mesmo quen actuou de xeito
individual; en calquera caso, a partir desta primeira xuntanza
aberta, onde todo está por decidir, as formas de interactuar a nivel
individual e a nivel grupal están supeditadas ao consenso e en
ningún caso deberían ser un tropezo para a horizontalidade que se
desexa neste proceso, pois iría en contra da esencia mesma da
plataforma.
Polo tanto, a propia
plataforma debera ser garante que calquera persoa poida propoñer e
traballar en pé de igualdade coas demais.
En definitiva, seremos
o que nos queiramos ser, aínda que non vai ser doado escapar das
etiquetas que, posiblemente, nos poñan desde diferentes medios ou
desde algunha organización que defende o xeito tradicional de facer
política.
Dentro das motivacións
que levaron a facer esta convocatoria, e antes de comezar co proceso
de construción colectivo, cómpre comentar unha serie de impresións
das que vos queremos facer participes e abrir debate.
Entendemos que o
sistema actual de representación e de participación política non é
garante de democracia.
Un sistema que promove
o abstencionismo político durante o período que comprende entre
eleccións e que unicamente atende á importancia da participación
para esas datas concretas -as “festas da democracia”- non pode
selo.
Cada catro anos
firmamos un cheque en branco a un grupo de persoas que terán que
decidir por nos, no mellor dos casos en base a unha especie de
contrato verbal, que se chama programa, e no peor, en base a
criterios persoais ou impostos polas súas estruturas de partido,
compostas xeralmente por persoas alleas á realidade local.
Sen entrar a valorar o
labor de ninguén e aínda presupoñendo as boas intencións e o
esforzo que supoñen estas tarefas de representación, estamos
seguros que o feito de afondar na idea de "suxeitos pasivos",
que delegan a súa responsabilidade á sorte da honestidade e o bo
facer dos políticos de oficio, é a verdadeira causa dos males dos
que adoece un sistema que se da en chamar democrático, pois,
posiblemente, desa falta de garantías nacen o clientelismo, a falta
de transparencia, o despotismo ou, mesmo, a intransixencia para
opcións alternativas.
Por dicilo doutro
xeito, a nosa proposta non quere estar fundamentada na oratoria nin
na pretensión de convencer a ninguén de que temos mellores ideas e
mellores formas de xestionar, se non, sinxelamente, en mudar os
métodos democráticos e procurar que os nosos representantes atendan
directamente á voz do pobo dentro dunha lóxica de procura do ben
común.
Pero, para mudar esta
visión monolítica de entender o exercicio político, é dicir, para
botar abaixo ese muro que separa aos gobernantes dos gobernados,
cómpre desfacernos tamén dalgunha das ideas que, querendo ou sen
querer, temos aceptadas no imaxinario colectivo como insalvables.
A primeira delas é a
de que o único vehículo posible para empoderar á cidadanía e
acceder as institucións públicas, son os partidos políticos.
Os partidos políticos,
sen negar a súa utilidade en determinados contextos, a maioría das
veces rematan por ser un fin en si mesmo e converten o goberno do
pobo nun goberno dunha minoría dominante, rexeitando calquera forma
de participación cidadá para seguir salvagardando os seus
privilexios como organización.
Para evitar esta
fórmula, a lei orgánica do réxime electoral xeral ofrece a
posibilidade de presentarse ás eleccións cunha figura xurídica que
ten por nome "Agrupación de electores".
Seguindo os
procedementos axeitados, para o que non fai falta nin darse de alta
como asociación, poderíamos presentarnos ás eleccións do concello
de Ribadeo cun aval mínimo de 100 firmas, e unha lista de 15
persoas como candidatos.
Pero a proposta de
crear unha plataforma veciñal vai moito mais alá que a de de
configurar sinxelamente unha candidatura veciñal.
A plataforma, como
dicía ao principio, ten como finalidade impulsar un proceso de
construción colectiva que se preocupe primeiramente de crear unha
nova estrutura de goberno en base ao asemblearismo.
Polo tanto, e aínda
que todo está por decidir, o obxectivo principal da convocatoria é
convidar a toda a veciñanza a participar da creación dese engranaxe
de asembleas onde calquera asociación, ou veciño a nivel
particular, organizados en grupos de traballo, sectoriais ou
territoriais, poda participar na toma de decisións e poda ter
cumprida información da xestión que se está a realizar.
A agrupación de
electores, neste proceso, é so un eslavón mais na cadea, e a
elección dos representantes neste caso, ao contrario da formula de
partidos, debe responder unicamente ao criterio popular.
Isto, seguramente,
requirirá dun exercicio de xenerosidade e intelixencia para atopar
entre nós ás persoas que están en mellor disposición para asumir
certas responsabilidades, pero o verdadeiro traballo está detrás,
no dia a dia da plataforma e das asembleas, onde, cada quen, ademais
de exercer a súa corresponsabilidade como veciño, terá a
oportunidade de poñer ao servizo do común a súas capacidades.
Para ir rematando, é
posible que alguén bote en falta dentro desta proposta uns
principios básicos ou fundamentos ideolóxicos; como todo está
aberto aínda, cómpre dicir que esta cuestión se irá traballando
en base ao debate e ao proxecto de futuro deseñemos para o noso
concello.
Abonda saber, polo de
agora, que quen participe desta plataforma o fai movido por un ideal
de xustiza, solidariedade e de procura do ben común por diante do
interese particular ou dunha organización concreta.
Isto xa é en si mesmo
un posicionamento de partida pois, sabendo das practicas habituais
cas que convivimos, temos abondo argumentos e exemplos para definir
un punto de non retorno.
Finalmente, tamén é
importante dicir que aínda que o traballo non vai ser nada doado,
por aquelo de que construír un modelo sempre é mais custoso que
destruílo, a nosa idea forma parte dun xeito de entender a política
ao que lle chegou o seu tempo, e existen unha morea de experiencias
similares que se están poñendo en marcha nas que nos podemos
apoiar, das que se pode aprender e mesmo interactuar para facer este
camiño.
